Pampuna Lélé

Informashon

Pampuna Lélé ta un kuminda tradishonal di Kòrsou prepará ku pampuna, karni salu, rabu, batata dushi, batata i banana konfeit. E kombinashon di pampuna ku un tiki suku, muskát i konofló ta duna e plato un sabor dushi i salu karakterístiko. Ta un kuminda yen di sabor ku ta forma parti di kushina tradishonal di Kòrsou.

Ingredièntenan

• 1 pampuna mediano.
• 1 liber di rabu.
• 1 liber di karni salu.
• 1 kucharita di muskát.
• 1 kucharita di konofló na pòlbu.
• 1 kuchara di manteka.
• 2 kuchara di suku.
• 3 batata dushi.
• 3 batata.
• 1 banana konfeit (banana hel ku algun mancha pretu).

Preparashon

1. Freska e rabu i karni salu. Despues di laba nan bon, pone nan den un wea ku awa, muskát, konofló i manteka. E awa mester ta mas o ménos kuater dede riba e karni.
2. Mientras e karninan ta kushiná, korta e pampuna, saka su mondongo i kask'é.
3. Ora e karninan a bira un tiki moli, agregá e pampuna na e wea i laga tur kos sigui kushiná.
4. Ora e pampuna a kushiná i bira moli, saka e karninan for di e wea i pone nan den un komchi.
5. Lélé e pampuna te ora e bira suave i bon mesklá.
6. Pone e karninan bek den e pampuna lélé.
7. Agregá e batata dushi, batata, banana konfeit i suku na e wea.
8. Laga tur kos kushiná un ratu mas te ora e batatanan i banana bira moli.
9. Ora tur kos ta bon kushiná, kita e wea for di kandela. Sirbi Pampoena Lélé kayente ku funchi.
10. E resèpt aki ta sufisiente pa mas o ménos seis persona.